Mediasie: Bitter Huwelik, Beter Egskeiding

Waarom bemiddeling?

Eerstens, jy het geen addisionele akkreditasie nodig om as bemiddelaar op te tree nie. Indien jy ‘n praktiserende regspraktisyn (prokureur of advokaat) is, is jy gekwalifiseerd om te litigeer of te medieer, as alternatief.

Daar word toenemend aanvaar dat die tradisionele adversatiewe litigasiestelsel, wat op die meeste ander gebiede van ons reg goed werk, vir die beslegting van egskeidingsake en ander gesinsgeskille nie baie geskik is nie. Meer spesifiek: die adversatiewe stelsel vererger die risikofaktore van egskeiding vir kinders.

As 'n gesinsregspraktisyn sal jy dus die paradigmaskuif moet maak om jou gesinsregspraktyk te verbreed en te herstruktureer ten einde die lewering van egskeidings- en gesinsbemiddelingsdienste aan jou kliënte in te sluit.

Bemiddeling is reeds verpligtend by ouerskapskwessies ingevolge die Kinderwet, en dit word aangemoedig in alle siviele aangeleenthede ingevolge die hofgedrewe bemiddelingsreëls van die Landdroshof en die Hooggeregshof, en dit gaan binnekort verpligtend word in alle gesinsaangeleenthede ingevolge die SA Regshervormingskommissie se Wetsontwerp op die Beslegting van Gesinsgeskille.